ភ្នំពេញ៖ អ្នកនាំពាក្យក្រសួងការបរទេស លោក ជុំ សុន្ទរី ប្រាប់ EAC News ថារដ្ឋមន្ត្រីការបរទេសអាស៊ានដែលនឹងត្រូវមកចូលរួមកិច្ចប្រជុំនៅកម្ពុជាបានបញ្ជាក់ពីវត្តមានក្នុងការចូលរួមហើយ លើកលែងតែមីយ៉ាន់ម៉ាដែលមិនទាន់បញ្ជាក់ពីការចូលរួមនៅឡើយទេ ខណៈប្រទេសថៃ និងព្រុយណេនឹងជួបប្រជុំតាមអនឡាញ។

កិច្ចប្រជុំចង្អៀតរដ្ឋមន្រ្តីការបរទេសអាស៊ាននឹងត្រូវរៀបចំនៅកម្ពុជាចាប់ពីថ្ងៃទី១៥ ដល់ទី១៧ ខែកុម្ភៈ ឆ្នាំ២០២២ នៅរាជធានីភ្នំពេញ ក្រោមទម្រង់ចូលរួមផ្ទាល់និងតាមប្រព័ន្ធវីដេអូពីចម្ងាយ ដែលរដ្ឋមន្ត្រីការបរទេសកម្ពុជា លោក ប្រាក់ សុខុន ជាអ្នកដឹកនាំកិច្ចប្រជុំ។

រដ្ឋសមាជិកអាស៊ានមិនបានឯកភាពក្នុងការអញ្ជើញរដ្ឋមន្ត្រីការបរទេសមីយ៉ាន់ម៉ាឱ្យចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ាននេះទេ ដោយសារមានភាពរីកចម្រើនតិចតួចរបស់មីយ៉ាន់ម៉ាក្នុងការអនុវត្តការគោលការណ៍៥ ចំណុចរបស់អាស៊ាន តែបានលើកទឹកចិត្តឱ្យមីយ៉ាន់ម៉ាបញ្ជូនអ្នកតំណាងមិននយោបាយមកជំនួសវិញ។

ក្រសួងការបរទេសបញ្ជាក់ថាក្នុងកិច្ចប្រជុំនេះ លោកឧបនាយករដ្ឋមន្ត្រី ប្រាក់ សុខុន នឹងជម្រាបជូនអង្គប្រជុំអំពីសមិទ្ធផលសំខាន់ៗ ដែលនឹងត្រូវសម្រេចបានក្នុងអំឡុងពេលភាពជាប្រធានអាស៊ានរបស់កម្ពុជា ក្រោមមូលបទ «អាស៊ាន រួមគ្នាធ្វើ៖ ដោះស្រាយបញ្ហាប្រឈមទាំងអស់គ្នា» ដើម្បីឆ្លើយតបទៅនឹងបញ្ហាប្រឈមជាយុទ្ធសាស្រ្ត ដែលកំពុងកើតឡើងនៅក្នុងតំបន់ រួមមាន ការគ្រប់គ្រងជំងឺរាតត្បាតកូវីដ-១៩ ប្រកបដោយប្រសិទ្ធភាព និងដំណើរការស្តារឡើងវិញប្រកបដោយបរិយាប័ន្ន ការប្រកួតប្រជែងភូមិសាស្រ្ត-នយោបាយ បញ្ហាជាប្រពៃណី និងមិនប្រពៃណីដែលមានស្រាប់ និងការពង្រឹងភាពស្អិតរមួត មជ្ឈភាព និងភាពធន់រឹងមាំរបស់អាស៊ាន។

មកដល់ពេលពេលនេះមានរដ្ឋមន្រ្តីការបរទេសចំនួន ២ហើយដែលបញ្ជាក់ពីដំណើរទស្សនកិច្ចមកប្រទេសកម្ពុជាជាផ្លូវការក្នុងនោះមាន រដ្ឋមន្រ្តីការបរទេសនៃសាធារណរដ្ឋសឹង្ហបុរី លោក វីវៀន បាឡាគ្រីស្ហ្សណាន់ និងរដ្ឋមន្រ្តីការបរទេសនៃសាធារណរដ្ឋប្រជាធិបតេយ្យប្រជាមានិតឡាវលោក សាលើមសៃ គុំម៉ាស៊ីត ដែលនឹងដឹកនាំគណៈប្រតិភូអញ្ជើញមកបំពេញទស្សនកិច្ចផ្លូវការ និងចូលរួមកិច្ចប្រជុំចង្អៀតរដ្ឋមន្រ្តីការបរទេសអាស៊ាន (ASEAN Foreign Ministers’ Retreat) នៅព្រះរាជាណាចក្រកម្ពុជា ៕